في أول خروج إعلامي له، تحدث حمدي ولد الرشيد رئيس المجلس البلدي في حوار لـ"كود" عن لقائه بالوفد الصحافي الامريكي البريطاني كما تطرق الى احداث العيون، وعبر من خلال "كود" عن ضرورة تطبيق الحكم الذاتي دون تردد.

كود: التقيتم هذا الصباح بالوفد الصحافي الامريكي البريطاني كيف كان اللقاء

اللقاء كان نص نص. فيه شذ وجذب

 

كيف؟

بانوا لي بوليساريو مائة في المائة. كيدافعو على اطروحتهم وگلنا ليهم خاصكم تعرفو باللي حنا صحراويين وخاصكم تعرفو وجهة نظرنا

ثم قدمنا لهم صورهم في المظاهرات  مع اميناتو حيدار. تفاجئوا واصيبوا بالذهول. ما كانش على بالهم باللي عندنا صور بيهم. قدمنا لهم صور الاعتداء ضد رجال الامن. من بعد كلشي هاد الشي عاد بردوا شوية

 

"كود": السي حمدي لعيون فيها أحداث هادي ايام، شكون اللي محرك هاد الشي؟

وراكم انتوما عارفين. هاد الشي ما يمكن يوقف إلا بتطبيق مشروع الحكم الذاتي. خاصو يكون باش يكون عندنا حنا شي حاجة باش تجاوبو هادو اللي كيخرجو للشارع

 

كود": يعني ان الحل هو الحكم الذاتي؟

بالنسبة لي هذا هو الحل. خاصو يطبق. دابا كاينة مجموعة تطالب بالجمهورية الصحراوية وخدامة بالليل والنهار وكاينة مجموعة وحدوية تطالب الحكم الذاتي تحت السيادة المغربية لمواجهة الجمهوريين

خاص تكون الجدية ويبدى تطبيق الحكم الذاتي ماشي كل مرة يطلع لينا مصطلح ها الجهوية الموسعة ها الجهوية المتقدمة

 

"كود": واش كتعتقد باللي هاد الشي المظاهرات محركاه جهات خارجية؟

انا كنعرف حاجة وحدة، هاد المسلسل محالش يسالي. انا كنعتبرو (الدعوات الانفصالية) سرطان خاصو دواء وبالزربة. علاجو الكيمائي الفعال هو الحكم الذاتي

 

06/05/2013